انڈر 19 سہ ملکی سیریز: پاکستان نے سنسنی خیز مقابلے کے بعد افغانستان کو ہرا دیا

ٹرائی سیریز کے ایک دلچسپ اور سنسنی خیز میچ میں پاکستان انڈر 19 ٹیم نے افغانستان انڈر 19 کو ایک وکٹ سے شکست دے دی۔

افغانستان انڈر 19 نے پہلے بیٹنگ کرتے ہوئے مقررہ 50 اوورز میں 226 رنز بنائے۔ پاکستان کی جانب سے عثمان خان نے شاندار بولنگ کا مظاہرہ کرتے ہوئے 37 رنز کے عوض 4 کھلاڑیوں کو آؤٹ کیا۔

ہدف کے تعاقب میں پاکستان انڈر 19 ٹیم نے انتہائی دباؤ کے باوجود شاندار کھیل پیش کیا اور تین گیندیں قبل نو وکٹوں کے نقصان پر مطلوبہ ہدف حاصل کر لیا۔

پاکستان کی جانب سے کپتان فرحان یوسف نے ذمہ دارانہ بیٹنگ کرتے ہوئے 65 رنز بنائے، جبکہ حمزہ ظہور نے 68 رنز کی شاندار اننگز کھیل کر ناٹ آؤٹ رہتے ہوئے ٹیم کو فتح سے ہمکنار کیا۔