فیلڈ مارشل سے انڈر 19 کرکٹ ٹیم کی ملاقات، ایشیا کپ جیتنے پر گرمجوشی سے مبارکباد

چیف آف ڈیفنس فورسز، فیلڈ مارشل سید عاصم منیر سے انڈر 19 ایشیا کپ جیتنے والی پاکستانی ٹیم نے ملاقات کی، جس میں فیلڈ مارشل نے کھلاڑیوں کی شاندار کارکردگی کو سراہتے ہوئے اسے پوری قوم کے لیے فخر قرار دیا۔

پاک فوج کے شعبہ تعلقات عامہ (آئی ایس پی آر) کے مطابق یہ ملاقات جی ایچ کیو راولپنڈی میں ہوئی، جہاں فیلڈ مارشل سید عاصم منیر نے ٹیم کے کھلاڑیوں، مینجمنٹ اور متعلقہ حکام کو ایشیا کپ جیتنے پر دلی مبارکباد پیش کی۔

فیلڈ مارشل سید عاصم منیر نے نوجوان کھلاڑیوں کی محنت، لگن اور جذبے کو خراجِ تحسین پیش کرتے ہوئے کہا کہ یہ کامیابی پاکستان کے نوجوانوں کی صلاحیت اور ٹیلنٹ کی عکاسی کرتی ہے۔ انہوں نے ٹیم کے نظم و ضبط، ٹیم ورک اور جرات مندی کی تعریف کی اور کہا کہ یہ کارنامہ پوری قوم کے لیے باعثِ فخر ہے۔

انہوں نے مزید کہا کہ پاکستان کے نوجوان ملک کے مستقبل کی بنیاد ہیں اور ان کی توانائی، صلاحیت اور کردار قومی ترقی اور عالمی سطح پر پاکستان کے مقام کے تعین میں اہم کردار ادا کرتے ہیں۔ فیلڈ مارشل نے نوجوانوں پر زور دیا کہ وہ نظم و ضبط، ایمانداری اور لگن کے ساتھ آگے بڑھتے ہوئے مختلف شعبوں میں ملک کا نام روشن کریں۔

اس موقع پر انڈر 19 ٹیم کے کھلاڑیوں نے فیلڈ مارشل سید عاصم منیر کا شکریہ ادا کرتے ہوئے کہا کہ ان کی حوصلہ افزائی اور حمایت ان کے لیے باعثِ مسرت اور مزید بہتر کارکردگی کی ترغیب ہے۔