اسلام آباد میں زیرِ زمین کیبل چوری کا بڑا نیٹ ورک بے نقاب، 4 ملزمان گرفتار

پنجاب کے جڑواں شہروں (راولپنڈی اور اسلام آباد) میں زیرِ زمین کیبل چوری کی متواتر وارداتوں کی تحقیقات میں بڑی پیش رفت سامنے آئی ہے، جہاں پولیس نے ایک منظم و بڑے گینگ کو بے نقاب کرتے ہوئے 4 ملزمان کو گرفتار کر لیا ہے۔

پولیس کے مطابق انٹیلی جنس بنیادوں پر کی گئی کارروائی کے دوران 1 ملزم کو تھانہ ویسٹریج اور 3 ملزمان کو تھانہ سول لائنز کی حدود سے حراست میں لیا گیا۔ ملزمان کے قبضے سے چوری شدہ قیمتی زیرِ زمین کیبلز اور ہیوی کٹر برآمد کر کے ان کے خلاف قانونی مقدمات درج کر لیے گئے ہیں۔ دورانِ تفتیش گرفتار ملزمان نے اعتراف کیا ہے کہ وہ جڑواں شہروں سے کیبلز چوری کر کے انہیں فروخت کے لیے گوجرانوالہ منتقل کرتے تھے۔

تحقیقاتی ذرائع نے سنسنی خیز انکشاف کرتے ہوئے بتایا کہ اس نیٹ ورک کا دائرہ کار کافی وسیع ہے جس میں اسکریپ ڈیلرز، دہاڑی دار مزدوروں اور راولپنڈی و اسلام آباد پولیس کے 5 اہلکاروں سمیت 50 سے زائد افراد کے ملوث ہونے کے شواہد ملے ہیں۔ تفتیشی حکام کے مطابق پولیس اہلکاروں اور اسکریپ ڈیلرز کی سرپرستی میں چلنے والے اس پورے گروہ کے دیگر روپوش ارکان کی گرفتاری کے لیے چھاپے مارے جا رہے ہیں۔