ترکیہ میں نئے سال پر داعش کا بڑا منصوبہ ناکام، 357 مشتبہ ارکان گرفتار

ترکیہ کی سکیورٹی فورسز نے ملک گیر کارروائی کے دوران ایک دن میں داعش کے 357 مشتبہ ارکان کو گرفتار کر لیا۔ وزیر داخلہ کے مطابق 21 صوبوں میں بیک وقت انسدادِ دہشت گردی کارروائیاں انجام دی گئیں، جن میں صوبائی پولیس، انسدادِ دہشت گردی اور انٹیلی جنس یونٹس نے حصہ لیا۔

استنبول کے چیف پبلک پراسیکیوٹر آفس کے مطابق شہر میں 110 مشتبہ افراد کو گرفتار کیا گیا، جو نئے سال کے موقع پر استنبول میں دہشت گردانہ کارروائیاں کرنے کا منصوبہ بنا رہے تھے۔ انقرہ کے چیف پبلک پراسیکیوٹر آفس نے تصدیق کی کہ داعش سے تعلق رکھنے والے 17 مشتبہ افراد کے وارنٹ گرفتاری جاری کیے گئے، جن میں 11 غیر ملکی شہری شامل ہیں۔

ترک حکام نے بتایا کہ چند روز قبل بھی استنبول میں کارروائیوں کے دوران 100 سے زائد مشتبہ داعش ارکان گرفتار کیے گئے تھے۔ چھاپوں کے دوران بڑی تعداد میں اسلحہ بھی برآمد ہوا۔

ترکیہ وزارت داخلہ نے واضح کیا ہے کہ ملک میں دہشت گردی کے خلاف زیرو ٹالرنس پالیسی پر عمل جاری ہے اور کسی بھی دہشت گرد تنظیم کو سرگرم ہونے کی اجازت نہیں دی جائے گی۔