امریکی ہوائی اڈوں پر مسافروں کی لمبی قطاریں، تنخواہوں کی عدم ادائیگی پر سکیورٹی عملہ غیر حاضر

امریکا کے مختلف ہوائی اڈوں پر سکیورٹی چیکنگ کے لیے مسافروں کو گھنٹوں طویل قطاروں کا سامنا کرنا پڑا، جہاں ٹرانسپورٹیشن سکیورٹی عملے کو تنخواہیں نہ ملنے کے باعث متعدد اہلکار ڈیوٹی پر حاضر نہیں ہوئے۔

صورتحال اس وقت مزید پیچیدہ ہو گئی جب وفاقی حکومت کے جزوی بند ہونے کے باعث محکمہ داخلی سلامتی کے ماتحت کام کرنے والا سکیورٹی عملہ مسلسل دوسری مرتبہ بھی اپنی تنخواہوں سے محروم رہا، جس کے بعد کئی اہلکاروں نے کام چھوڑ دیا جبکہ متعدد نے ملازمت ہی ترک کر دی۔

امریکی صدر ڈونلڈ ٹرمپ کی جانب سے امیگریشن اہلکاروں کو ہوائی اڈوں پر تعینات کر کے مسافروں کی قطاریں سنبھالنے کی کوشش کی گئی، تاہم متعدد شہروں میں اس اقدام کے فوری اثرات دکھائی نہیں دیے اور مسافروں کو بدستور مشکلات کا سامنا رہا۔

اٹلانٹا کے مصروف ترین ہوائی اڈے پر صورتحال خاص طور پر خراب رہی جہاں قطاریں سکیورٹی حصے سے نکل کر سامان حاصل کرنے کے مقامات اور بیرونی حصوں تک پھیل گئیں، اور کئی مسافر صبح سویرے سے اپنی پروازوں کے انتظار میں کھڑے رہے۔

دوسری جانب سیاسی سطح پر جاری تعطل کی بنیادی وجہ امیگریشن اہلکاروں کے خلاف اقدامات سے متعلق اختلافات بتائے جا رہے ہیں، جبکہ اس صورتحال پر مسافروں اور ماہرین کی جانب سے شدید تشویش کا اظہار کیا جا رہا ہے۔

ماہرین کا کہنا ہے کہ سکیورٹی عملے کو بروقت تنخواہوں کی ادائیگی ہی اس بحران کا مستقل حل ہے، بصورت دیگر ہوائی سفر کا نظام مزید متاثر ہو سکتا ہے۔