معاہدہ کرو ورنہ اگلا ہدف بجلی گھر اور پل ہوں گے، صدر ٹرمپ

امریکی صدر ڈونلڈ ٹرمپ نے ایران کے خلاف اپنے سخت ترین مؤقف کا اعادہ کرتے ہوئے شدید وارننگ دی ہے کہ اگر تہران نے مذاکرات اور معاہدے کی راہ اختیار نہ کی، تو آئندہ ہفتے سے ایران کے اہم ترین توانائی کے مراکز، بجلی گھروں اور پلوں سمیت بنیادی انفراسٹرکچر کو نشانہ بنایا جائے گا۔ ایک ٹی وی انٹرویو کے دوران صدر ٹرمپ نے واضح کیا کہ ایران کے خلاف امریکی فوجی کارروائیاں اس وقت تک جاری رہیں گی جب تک تہران خود انہیں روکنے کا فیصلہ نہیں کرتا۔ انہوں نے دعویٰ کیا کہ منگل کے روز امریکا نے ایران سے باقاعدہ رابطہ کر کے اسے تنازع کو مذاکرات کے ذریعے حل کرنے کا موقع فراہم کیا ہے، لیکن اگر اس میں پیش رفت نہ ہوئی تو حملوں کا دائرہ کار مزید وسیع کر دیا جائے گا۔ ان کا مزید کہنا تھا کہ ایران کی فوجی صلاحیتیں پہلے ہی کافی حد تک کمزور ہو چکی ہیں اور اب اس کے پاس طویل مزاحمت کی گنجائش نہیں بچی۔

دوسری جانب، صدر ٹرمپ نے آبنائے ہرمز سے گزرنے والے تجارتی بحری جہازوں پر ٹول ٹیکس عائد کرنے کے اپنے گزشتہ متنازع بیان سے بھی باضابطہ یوٹرن لے لیا ہے۔ انہوں نے کہا کہ وہ اب یہ نہیں چاہتے کہ کوئی بھی ملک یا فریق آبنائے ہرمز پر کسی قسم کا ٹول ٹیکس وصول کرے، بلکہ اس کے بجائے وہ چاہتے ہیں کہ خلیجی ممالک ٹول کی ادائیگی کی بجائے براہِ راست امریکا میں بڑے پیمانے پر سرمایہ کاری کو ترجیح دیں۔