دوبارہ حملے کی صورت میں جنگ کا دائرہ بحرِ ہند سے آگے تک پھیل سکتا ہے: ایران

ایران کے سپریم لیڈر کے عسکری مشیر میجر جنرل یحییٰ رحیم صفوی نے خبردار کیا ہے کہ اگر امریکا یا اسرائیل کی جانب سے ایران پر دوبارہ کوئی عسکری حملہ کیا گیا تو اس جنگ کا دائرہ خلیج فارس اور مشرق وسطیٰ سے نکل کر بحرِ ہند اور ممکنہ طور پر اس سے بھی آگے تک پھیل سکتا ہے۔ ایرانی خبر رساں ادارے فارس نیوز کو جاری کردہ ایک ویڈیو بیان میں ان کا کہنا تھا کہ موجودہ تنازع پہلے ہی خلیج فارس اور آبنائے ہرمز سے لے کر بحیرۂ احمر تک پھیل چکا ہے، اور صورتحال مزید بگڑنے کی صورت میں بحرِ ہند میں بھی ایک نیا محاذ کھل سکتا ہے۔

میجر جنرل صفوی نے دوٹوک الفاظ میں کہا کہ ایرانی مسلح افواج نے امریکا اور اسرائیل کے کسی بھی ممکنہ نئے حملے کی صورت میں بدترین حالات اور ہر قسم کے حالات کار سے نبردآزما ہونے کے لیے جامع دفاعی منصوبے تیار کر رکھے ہیں۔ انہوں نے خبردار کیا کہ نئی جنگ کی صورت میں بحیرۂ احمر اور آبنائے باب المندب کے اسٹریٹجک مرکز پر دباؤ میں مزید شدت آئے گی۔ اس کے علاوہ انہوں نے بحیرۂ احمر کے ساحلی علاقوں پر کنٹرول حاصل کرنے اور اسٹریٹجک پوزیشن برقرار رکھنے پر یمن کے حوثی گروپ کی تعریف بھی کی۔