آبنائے ہرمز کھلوانے میں مدد نہ کی تو نیٹو کا مستقبل بہت خراب ہوگا، ٹرمپ کی دھمکی

امریکی صدر ڈونلڈ ٹرمپ نے نیٹو کو خبردار کرتے ہوئے کہا ہے کہ اگر اتحاد نے آبنائے ہرمز کھلوانے میں مدد نہ کی تو نیٹو کا مستقبل بہت برا ہوسکتا ہے۔
برطانوی اخبار کے مطابق ٹرمپ نے کہا کہ رواں ماہ کے آخر میں چین کے صدر کے ساتھ طے شدہ ملاقات بھی تاخیر کا شکار ہوسکتی ہے۔
امریکی صدر کا کہنا تھا کہ یہ ملاقات اسی صورت مناسب ہوگی جب آبنائے ہرمز سے فائدہ اٹھانے والے ممالک یہ یقینی بنانے میں مدد کریں کہ وہاں کوئی خراب صورتحال پیدا نہ ہو۔
اس سے قبل ٹرمپ نے ہفتے کے روز چین سمیت دنیا کے مختلف ممالک سے آبنائے ہرمز کھلوانے کے لیے مدد طلب کی تھی اور امید ظاہر کی تھی کہ چین کے ساتھ ساتھ فرانس، جاپان، جنوبی کوریا، برطانیہ اور دیگر ممالک اپنے جنگی جہاز اس علاقے میں بھیجیں گے۔
تاہم آبنائے ہرمز کھلوانے کے لیے ٹرمپ کی اپیل پر دنیا بھر میں خاص ردعمل سامنے نہیں آیا۔ جاپان نے اپنے بحری جہاز بھیجنے سے انکار کر دیا جبکہ چین نے بھی اس مطالبے پر خاموشی اختیار کر رکھی ہے۔
واشنگٹن میں چینی سفارت خانے کا کہنا ہے کہ چین متعلقہ فریقین کے ساتھ رابطوں کو مؤثر بنانے میں تعمیری کردار ادا کرے گا۔
دوسری جانب برطانیہ کے وزیر توانائی ایڈ ملی بینڈ نے کہا ہے کہ آبنائے ہرمز کو کھلا رکھنے کے لیے امریکا اور دیگر اتحادیوں سے رابطے جاری ہیں اور ممکن ہے بارودی سرنگیں تلاش کرنے والے ڈرون بھیجے جائیں۔
جنوبی کوریا نے کہا ہے کہ وہ ٹرمپ کی اپیل کا جائزہ لے رہا ہے جبکہ فرانس پہلے ہی خطے میں اپنے بحری جہاز بھیجنے سے انکار کر چکا ہے۔