بھارت دوبارہ پاکستان پر جنگ مسلط کرنے والا تھا،ٹرمپ کا انکشاف

امریکی صدر ڈونلڈ ٹرمپ نے دعویٰ کیا ہے کہ بھارت ایک بار پھر پاکستان پر جنگ مسلط کرنے کے قریب تھا اور اس صورتحال کو انہوں نے مداخلت کر کے روکا۔
وائٹ ہاؤس میں سعودی ولی عہد محمد بن سلمان کے ساتھ گفتگو کرتے ہوئے ٹرمپ نے کہا کہ انہیں دنیا کی آٹھ بڑی جنگیں رکوانے کا اعزاز حاصل ہے۔

ٹرمپ کا کہنا تھا کہ پاکستان اور بھارت کے درمیان نہ صرف اُس وقت کشیدگی کم کروائی بلکہ اس جنگ کو بھی روکا جو دوبارہ بھڑکنے والی تھی۔ ان کے مطابق دونوں ممالک اب بہتر اقدامات کی جانب بڑھ رہے ہیں۔

امریکی صدر نے یہ بھی کہا کہ انہوں نے عالمی سطح پر تجارت کی بنیاد پر کئی تنازعات کو ٹھنڈا کیا، جبکہ روس اور یوکرین جنگ کے جلد خاتمے کی امید بھی ظاہر کی۔
ان کا کہنا تھا کہ انہیں اندازہ نہیں تھا کہ روس یوکرین جنگ بندی کا عمل اتنا طویل ہو جائے گا۔

ایران کے ساتھ جوہری معاہدے پر بات چیت شروع

میڈیا سے گفتگو میں ڈونلڈ ٹرمپ نے ایران کے ایٹمی پروگرام سے متعلق سوالات کا جواب دیتے ہوئے کہا کہ تہران معاہدہ چاہتا ہے اور وہ بھی اس حوالے سے تیار ہیں۔
ٹرمپ کے مطابق ایران کے ساتھ نئے جوہری معاہدے پر ابتدائی بات چیت کا آغاز ہو چکا ہے۔