امریکی صدر ٹرمپ نے نطنز کے پہاڑوں میں ایرانی ایٹمی مرکز پر حملے کی دھمکی دے دی

امریکی صدر ڈونلڈ ٹرمپ نے ایران کے شہر نطنز کے پہاڑوں میں قائم ایٹمی مرکز پر جلد حملے کی دھمکی دیتے ہوئے کہا ہے کہ ایرانی اس حملے کو روکنے کے لیے کچھ نہیں کر سکیں گے۔ وائٹ ہاؤس میں لبنانی صدر جوزف عون سے ملاقات کے موقع پر صحافیوں سے گفتگو کرتے ہوئے ٹرمپ نے دعویٰ کیا کہ اگر امریکی بی ٹو (B-2) بمبار طیارے ایک سال پہلے ایرانی نیوکلیئر سائٹس کو نشانہ نہ بناتے تو ایران اب تک ایٹمی ہتھیار بنا چکا ہوتا اور اسرائیل کا وجود ختم ہو جاتا۔ امریکی صدر کا مزید کہنا تھا کہ ایرانی قیادت شدید تباہی کے بعد اب امریکا سے ملاقات کے لیے بے تاب ہے لیکن واشنگٹن فی الوقت ان سے ملنے کی کوئی خواہش نہیں رکھتا۔ انہوں نے یہ بھی کہا کہ ایران آبنائے ہرمز کی دھمکی دے کر امریکی کانگریس کے آئندہ نومبر کے انتخابات پر اثر انداز ہونے کی کوشش کر رہا ہے۔