امریکی صدر ٹرمپ نے اسرائیل کو ایران کی توانائی تنصیبات پر مزید حملوں سے روک دیا

امریکا کے صدر ڈونلڈ ٹرمپ نے اسرائیل کی جانب سے ایران کے اہم گیس فیلڈ پر حملے کے بعد ایرانی توانائی تنصیبات کو مزید نشانہ بنانے کی مخالفت کر دی ہے۔

امریکی اخبار وال اسٹریٹ جرنل کی رپورٹ کے مطابق صدر ٹرمپ کا کہنا ہے کہ ایران کو واضح پیغام دیا جا چکا ہے، اس لیے توانائی تنصیبات پر مزید حملوں کی ضرورت نہیں رہی۔

رپورٹ کے مطابق اسرائیل نے بدھ کے روز ایران کے جنوبی پارس گیس فیلڈ کو نشانہ بنایا، جو دنیا کے بڑے ترین گیس ذخائر میں شمار ہوتا ہے اور ایران کی توانائی ضروریات کا اہم ذریعہ ہے۔

اخبار کے مطابق صدر ٹرمپ کو اس کارروائی کا پیشگی علم تھا، تاہم ان کا مؤقف حتمی نہیں اور اگر ایران نے آبنائے ہرمز میں مزید اشتعال انگیزی کی تو امریکا دوبارہ ایسے حملوں کی حمایت کر سکتا ہے۔

دوسری جانب ایران نے ساؤتھ پارس فیلڈ پر حملے کے بعد خطے میں ان تمام تیل تنصیبات کو ہدف بنانے کا عندیہ دیا ہے جو امریکی کمپنیوں کی ملکیت ہیں یا ان کے زیر انتظام چل رہی ہیں۔

اسی تناظر میں ایران نے قطر میں راس لفان انڈسٹریل سٹی پر میزائل حملہ کیا، جس کے نتیجے میں آگ بھڑک اٹھی، تاہم قطر انرجی کے مطابق اس حملے میں کوئی جانی یا مالی نقصان نہیں ہوا۔

قطر نے اس حملے کی شدید مذمت کرتے ہوئے اسے خطرناک کشیدگی اور ریاستی خودمختاری کی کھلی خلاف ورزی قرار دیا ہے۔