آبنائے ہرمز سے خود تیل لائیں، امریکا مدد نہیں کرے گا: ٹرمپ یورپی ممالک پر برس پڑے

واشنگٹن: امریکی صدر ڈونلڈ ٹرمپ نے ایران کے خلاف حالیہ عسکری صورتحال میں ساتھ نہ دینے والے یورپی ممالک کو آڑے ہاتھوں لیتے ہوئے واضح کر دیا ہے کہ اب امریکہ ان کے تحفظ کے لیے مزید اقدامات نہیں کرے گا۔ اپنی سوشل میڈیا پوسٹ میں ٹرمپ نے سخت الفاظ استعمال کرتے ہوئے لکھا کہ “ملکوں کو اب یہ سیکھنا پڑے گا کہ اپنی خاطر لڑائی کیسے لڑی جاتی ہے، امریکہ اب آپ کی مدد کو نہیں آئے گا کیونکہ آپ بھی ہمارے لیے نہیں آئے تھے۔”

برطانیہ کو مخاطب کرتے ہوئے صدر ٹرمپ نے کہا کہ اگر آبنائے ہرمز کی بندش کی وجہ سے انہیں جیٹ فیول حاصل کرنے میں مشکل ہو رہی ہے، تو وہ خود ہمت پیدا کریں اور وہاں جا کر اپنا تیل لے آئیں۔ انہوں نے طنزیہ مشورہ دیتے ہوئے کہا کہ اگر وہ ایسا نہیں کر سکتے تو امریکہ سے تیل خرید لیں کیونکہ امریکہ کے پاس وافر مقدار میں تیل موجود ہے۔

فرانس کے خلاف بھی اپنی ناراضی کا اظہار کرتے ہوئے ٹرمپ نے انکشاف کیا کہ پیرس نے اسرائیل کے لیے عسکری سامان لے جانے والے امریکی طیاروں کو اپنی فضائی حدود استعمال کرنے کی اجازت نہیں دی۔ انہوں نے ایرانی رہبرِ اعلیٰ کی ہلاکت کے مشن میں فرانس کے عدم تعاون پر شکوہ کرتے ہوئے لکھا کہ “فرانس بہت غیر مددگار رہا، امریکہ یہ بات یاد رکھے گا۔” پوسٹ کے اختتام پر انہوں نے دعویٰ کیا کہ ایران بنیادی طور پر تباہ ہو چکا ہے اور مشکل کام ختم ہو گیا ہے، اب باقی دنیا اپنا بندوبست خود کرے۔