مشتبہ شخص نے 15گز دور سے حملے کی کوشش کی، واقعے کا ایران جنگ سے تعلق نہیں، ٹرمپ

امریکی صدر ڈونلڈ ٹرمپ نے واشنگٹن میں پریس ڈنر کے دوران فائرنگ کے واقعے پر ردعمل دیتے ہوئے کہا ہے کہ مشتبہ شخص نے پندرہ گز کے فاصلے سے حملے کی کوشش کی، تاہم فوری کارروائی کے باعث بڑا نقصان ٹل گیا۔

صدر ٹرمپ نے میڈیا سے گفتگو میں کہا کہ مشتبہ شخص کے پاس متعدد ہتھیار موجود تھے اور اس نے سکیورٹی چیک پوائنٹ پر حملہ کیا، تاہم حفاظتی اہلکاروں نے بہادری اور بروقت اقدام کرتے ہوئے اسے قابو کر لیا۔

انہوں نے کہا کہ واقعے کے دوران اچانک زور دار آوازیں سنائی دیں، ابتدا میں صورتحال واضح نہیں تھی، تاہم سکیورٹی اداروں نے فوری طور پر حالات سنبھال لیے۔

امریکی صدر کے مطابق ایک اہلکار کو گولی لگی لیکن حفاظتی جیکٹ کی وجہ سے وہ محفوظ رہا۔

ٹرمپ نے کہا کہ ان کے خیال میں اس واقعے کا ایران سے جاری کشیدگی یا جنگی صورتحال سے کوئی تعلق نہیں۔

انہوں نے مزید کہا کہ گرفتار مشتبہ شخص کا تعلق کیلیفورنیا سے ہے اور حکام جلد معلوم کرلیں گے کہ آیا وہ اکیلا تھا یا اس کے ساتھ کوئی اور بھی شامل تھا۔