ٹرمپ کا ایران پر جلد بڑے فیصلے کا اعلان، تباہی یا معاہدے کے آپشنز زیرِغور

امریکی صدر ڈونلڈ ٹرمپ نے انکشاف کیا ہے کہ وہ ایران کے حوالے سے ایک خمی اور بڑا فیصلہ کرنے کے بالکل قریب پہنچ چکے ہیں، جس کے تحت ایران کے سامنے فوجی کارروائی، معاشی تباہی اور معاہدے سمیت متعدد راستے کھلے ہیں۔ امریکی ذرائع ابلاغ کو دیے گئے تازہ انٹرویو میں صدر ٹرمپ نے کہا کہ واشنگٹن فی الوقت مختلف امکانات پر غور کر رہا ہے، جن میں ایران کو مکمل طور پر ملیا میٹ کرنا، اسے معاشی طور پر تباہ کر کے مفلوج کر دینا، یا پھر بالآخر ایک نیا اور حتمی معاہدہ کرنا شامل ہے۔

امریکی صدر نے خبردار کرتے ہوئے کہا کہ مستقبل قریب میں مشرقِ وسطیٰ میں بہت بڑے اور اہم واقعات رونما ہو سکتے ہیں۔ انہوں نے اشارہ دیا کہ اگرچہ واشنگٹن کی جانب سے فوجی اور معاشی دباؤ میں مسلسل اضافہ کیا جا رہا ہے، لیکن دوسری جانب سفارتی بنیادوں پر بات چیت کی گنجائش بھی اب بھی موجود ہے۔ صدر ٹرمپ کا مزید کہنا تھا کہ وہ نیویارک میں اقوامِ متحدہ کی جنرل اسمبلی کے سالانہ اجلاس کے موقع پر ایرانی صدر مسعود پزشکیان سے ممکنہ ملاقات کے آپشن پر بھی غور کرنے کے لیے تیار ہیں۔

ٹرمپ انتظامیہ کی جانب سے سامنے آنے والا یہ متضاد بیان ایک ایسے وقت میں آیا ہے جب خطے میں امریکہ اور ایران کے درمیان فوجی کشیدگی اور بحری محاصرہ شدید ترین سطح پر پہنچ چکا ہے۔ قبل ازیں، وائٹ ہاؤس نے ایران کی معیشت کو الگ تھلگ کرنے کے لیے ‘آپریشن اکنامک فیوری’ کے تحت تاریخی و معاشی پابندیوں اور کارروائیوں کا سلسلہ شروع کر رکھا ہے، جبکہ دوسری جانب پینٹاگون خطے میں امریکی فوجی اڈوں اور بحری بیڑوں پر ایران کے ممکنہ جوابی حملوں کے بعد ہر قسم کے دفاعی ردِعمل کی تیاری مکمل کر رہا ہے۔