ایران پر بھرپور فوجی حملوں کی منصوبہ بندی کر رہے ہیں: ٹرمپ

امریکی صدر ڈونلڈ ٹرمپ نے انکشاف کیا ہے کہ امریکا ایران پر مزید اور شدید ترین فوجی حملوں کی باقاعدہ منصوبہ بندی کر رہا ہے۔ کابینہ کے اجلاس کے دوران میڈیا سے گفتگو کرتے ہوئے امریکی صدر نے واضح کیا کہ ان کارروائیوں کا بنیادی مقصد ایرانی حکومت کو ہتھیار ڈالنے اور مکمل تسلیمِ شکست پر مجبور کرنا ہے۔ ان کا کہنا تھا کہ ایرانی اشتعال انگیزیوں کا تسلسل اب برداشت سے باہر ہوتا جا رہا ہے۔

صدر ٹرمپ کا کہنا تھا کہ ایران کے ساتھ کسی معاہدے یا ڈیل پر سے اعتماد ختم ہو چکا ہے کیونکہ ایرانی حکام مسلسل جھوٹ بولتے اور کیے گئے وعدوں سے مکر جاتے ہیں۔ جنگ بندی سے متعلق سوال پر انہوں نے صاف الفاظ میں کہا کہ امریکا کسی بھی قسم کی جنگ بندی کے بجائے صرف اور صرف مکمل فتح کا خواہاں ہے۔ انہوں نے مزید دعویٰ کیا کہ اب تک کے امریکی حملوں میں ایرانی بحریہ، فضائیہ اور ایئر ڈیفنس سسٹم کا بڑا حصہ تباہ ہو چکا ہے اور واشنگٹن کسی صورت تہران کو جوہری ہتھیار حاصل کرنے کی اجازت نہیں دے گا۔

بعد ازاں امریکی میڈیا سے گفتگو کے دوران صدر ٹرمپ نے ایران کے خلاف جاری فوجی حکمت عملی پر اطمینان کا اظہار کرتے ہوئے کہا کہ معرکہ ان کے حق میں جا رہا ہے۔ انہوں نے دعویٰ کیا کہ شدید امریکی دباؤ اور حملوں کے باعث اب ایران کے پاس پیچھے ہٹنے اور گھٹنے ٹیکنے کے سوا کوئی دوسرا راستہ نہیں بچے گا اور ایک وقت ایسا آئے گا کہ وہ خود تسلیم کریں گے کہ وہ مزید تاب نہیں لا سکتے۔