امریکی ہتھیاروں کے ذخائر سے متعلق معلومات افشا ہونے پر ٹرمپ کا تحقیقات کا حکم

امریکی صدر ڈونلڈ ٹرمپ نے ایران کے ساتھ جاری جنگ کے دوران امریکی فوج کے حساس ہتھیاروں اور گولہ بارود کے ذخائر سے متعلق معلومات میڈیا تک پہنچنے کے معاملے کی اعلیٰ سطح کی تحقیقات کا حکم دے دیا ہے۔

امریکی اخبار “وال سٹریٹ جرنل” کے مطابق صدر ٹرمپ نے پینٹاگون کے عسکری ذخائر سے متعلق حساس پورٹس افشا ہونے پر شدید تشویش اور ناراضی کا اظہار کرتے ہوئے یہ ہدایت جاری کی ہے۔ امریکی انتظامیہ ان رپورٹس کو لے کر گہری تشویش میں مبتلا ہے جن میں دعویٰ کیا گیا ہے کہ معرکے کے دوران امریکا کے پاس پٹریٹ میزائلوں، فضائی دفاعی نظام اور دیگر اہم جنگی سازوسامان کی دستیابی میں نمایاں کمی واقع ہوئی ہے۔ اگرچہ وائٹ ہاؤس مسلسل یہ موقف اپنا رہا ہے کہ امریکا کے پاس ایران کے خلاف کارروائیاں جاری رکھنے کے لیے بھرپور عسکری صلاحیت موجود ہے، تاہم نجی ملاقاتوں میں صدر ٹرمپ نے ان خبروں پر سخت برہمی ظاہر کی ہے۔

اخبار کے مطابق صدر ٹرمپ کا مؤقف ہے کہ امریکی عسکری صلاحیتوں اور ہتھیاروں کی کمی سے متعلق خبریں تہران کو یہ غلط تاثر دے سکتی ہیں کہ واشنگٹن طویل جنگ جاری رکھنے کی پوزیشن میں نہیں، جس سے ایران کی حوصلہ افزائی ہو سکتی ہے۔ انہوں نے تشویش ظاہر کی کہ اس طرح کا لیک جوہری پروگرام سے متعلق ایران پر دباؤ بڑھانے کی امریکی سفارتی پوزیشن کو کمزور کر سکتا ہے۔ چنانچہ تحقیقات کا بنیادی مقصد مزید حساس عسکری معلومات کے افشا کو روکنا اور امریکی عسکری پوزیشن کی رازداری قائم رکھنا ہے۔