جنگ جاری رہے گی، ٹرمپ کا آئندہ 2 سے 3 ہفتوں میں ایران پر مزید شدید حملے کرنے کا اعلان

واشنگٹن: امریکی صدر ڈونلڈ ٹرمپ نے قوم سے خطاب کرتے ہوئے ایران کے خلاف جاری ایک ماہ طویل فوجی آپریشن کی کامیابیوں کا دعویٰ کیا ہے۔ صدر نے کہا کہ گزشتہ چار ہفتوں میں امریکی فوج نے ایران کی بحریہ (Navy) اور فضائیہ (Air Force) کو مکمل طور پر مفلوج کر دیا ہے، جبکہ ان کی ایٹم بم بنانے کی صلاحیت اور کئی اہم رہنماؤں کا خاتمہ کر دیا گیا ہے۔ ٹرمپ کے مطابق “ایران میں موجودہ رجیم ختم ہو چکا ہے” اور اب وہ امریکہ یا خطے کے لیے کوئی بڑا خطرہ نہیں رہا۔

صدر ٹرمپ نے انکشاف کیا کہ جنگ کا مشکل ترین حصہ مکمل ہو چکا ہے اور اسٹریٹجک مقاصد حاصل کیے جا رہے ہیں۔ انہوں نے ایرانی حکومت پر 45 ہزار مظاہرین کے قتل کا الزام بھی عائد کیا، تاہم اس کے شواہد پیش نہیں کیے۔ خطاب کے دوران انہوں نے ایرانی تیل کی تنصیبات کو نشانہ بنانے کا بھی اشارہ دیا، جو عالمی توانائی کی منڈیوں کے لیے ایک بڑا پیغام ہے۔

دلچسپ بات یہ ہے کہ صدر ٹرمپ نے دوٹوک الفاظ میں کہا کہ امریکہ کو اب آبنائے ہرمز (Strait of Hormuz) کی ضرورت نہیں ہے، کیونکہ امریکہ وینزویلا کے بعد اب تیل اور گیس کا دنیا کا نمبر ون پروڈیوسر بن چکا ہے۔ انہوں نے اسرائیل، سعودی عرب، قطر، متحدہ عرب امارات، کویت اور بحرین کو “عظیم ممالک” قرار دیتے ہوئے یقین دلایا کہ امریکہ ان اتحادیوں کو کسی بھی صورت ناکام نہیں ہونے دے گا۔