ہماری فوج نے بہترین کام کیا، ایران ڈیل چاہتا ہے: صدر ٹرمپ

واشنگٹن: امریکی صدر ڈونلڈ ٹرمپ نے کہا ہے کہ ہماری فوج نے بہترین کارکردگی دکھائی ہے اور ایران ڈیل کے لیے بات چیت کا عمل جاری ہے۔

صدر ٹرمپ نے میڈیا سے گفتگو کرتے ہوئے مزید کہا کہ اگر میں صدر منتخب نہ ہوتا تو امریکا اب تک شدید مشکلات کا شکار ہو چکا ہوتا۔ انہوں نے کہا کہ میں نے جرائم پیشہ افراد اور قاتلوں کو ملک سے نکالا اور ماضی میں امریکا میں داخل ہونے والے دنیا کے برے افراد پر اعتراض کیا۔

امریکی صدر نے اس موقع پر زور دیا کہ ایران ڈیل چاہتے ہیں اور اس سلسلے میں مذاکرات مثبت انداز میں جاری ہیں۔

دوسری جانب امریکی وزیر خارجہ مارکو روبیو نے فرانس میں جی سیون وزرائے خارجہ سے ملاقات کے بعد کہا کہ ایران میں زمینی فوج اتارے بغیر اپنے مقاصد حاصل کیے جا سکتے ہیں۔ مارکو روبیو نے توقع ظاہر کی کہ ایران میں ممکنہ جنگ مہینوں نہیں بلکہ ہفتوں میں ختم ہو جائے گی۔

انہوں نے یہ بھی کہا کہ ایران میں فوجی مقاصد کے باوجود آبنائے ہرمز کو کھلا رکھنا ایک فوری چیلنج بن سکتا ہے۔