جوہری تعمیرات جاری رہیں تو قیامت برپا کریں گے، ٹرمپ کا ایران کو سخت پیغام

امریکی صدر ڈونلڈ ٹرمپ نے ایک بار پھر ایران کو سخت پیغام دیا ہے کہ اگر وہ اپنے جوہری پروگرام کی تعمیرات جاری رکھیں تو ان پر “قیامت برپا” کی جائے گی۔ صدر ٹرمپ نے یہ بات فلوریڈا میں اسرائیلی وزیراعظم نیتن یاہو سے ملاقات کے بعد صحافیوں سے گفتگو کے دوران کہی۔

صدر ٹرمپ کا کہنا تھا کہ ایران دوبارہ جوہری تنصیبات تعمیر کرنے کی کوشش کر رہا ہے، اور اگر ایسا ہوا تو وہ فوری حملوں کی حمایت کریں گے۔ انہوں نے مزید کہا کہ “اگر ایران جوہری پروگرام دوبارہ تعمیر کرے تو ہمیں انہیں روکنا ہوگا۔ ایران کو معاہدہ کر لینا چاہیے، لیکن کبھی کبھی ایسا نہیں ہوتا”۔

اسرائیلی وزیراعظم سے ملاقات کے حوالے سے صدر ٹرمپ نے بتایا کہ دونوں رہنماؤں کے درمیان پانچ بڑے موضوعات پر بات چیت ہوگی۔ انہوں نے کہا کہ غزہ منصوبے کا دوسرا مرحلہ جلد شروع ہونے کی امید ہے اور غزہ کی تعمیر نو فوراً شروع کر دی جائے گی۔

اس کے علاوہ صدر ٹرمپ نے روسی صدر ولادیمیر پیوٹن کی رہائش گاہ پر یوکرینی حملے کے حوالے سے بھی تبصرہ کیا اور کہا کہ اس خبر کو سن کر انہیں بہت برا لگا اور شدید غصہ آیا۔ ان کے مطابق، یوکرین میں امن کے لیے ابھی بھی پیچیدہ مسائل موجود ہیں۔