ایران کی یورینیم افزودگی ناقابل قبول، جوہری مذاکرات پر مایوسی ہوئی، صدر ٹرمپ

واشنگٹن: امریکی صدر ڈونلڈ ٹرمپ نے ایران کے جوہری پروگرام سے متعلق حالیہ مذاکرات پر مایوسی کا اظہار کرتے ہوئے کہا ہے کہ ایران کو کسی بھی درجے پر یورینیم افزودگی کی اجازت نہیں دی جا سکتی۔

صدر ٹرمپ کا کہنا تھا کہ ایران محدود افزودگی چاہتا ہے، مگر امریکا کے لیے یہ شرط ناقابل قبول ہے۔ انہوں نے واضح کیا کہ ایران امریکا کے ضروری مطالبات تسلیم کرنے پر آمادہ نہیں، اسی لیے وہ مذاکرات کے نتائج سے مطمئن نہیں۔

انہوں نے مزید کہا کہ وہ ایران کے خلاف فوجی طاقت استعمال کرنے کے خواہاں نہیں، تاہم بعض مواقع پر سخت اقدامات ناگزیر ہو سکتے ہیں۔

ادھر اومان کے ایک اعلیٰ سفارتی ذریعے نے دعویٰ کیا ہے کہ ایران نے افزودہ یورینیم ذخیرہ نہ کرنے پر آمادگی ظاہر کی ہے، جس سے مذاکرات میں پیش رفت کا امکان ظاہر کیا جا رہا ہے۔