طیارہ گرنے کے باوجود ایران کے ساتھ مذاکرات جاری رہیں گے ، امریکی صدر

امریکی صدر ڈونلڈ ٹرمپ نے واضح کیا ہے کہ جنگی طیارے کی تباہی ایران کے ساتھ جاری مذاکراتی عمل کو متاثر نہیں کرے گی۔

انہوں نے کہا کہ امریکا اس وقت جنگی صورتحال میں ہے اور ایسے حالات میں فوجی نقصانات غیر معمولی نہیں ہوتے، تاہم سفارتی کوششیں بدستور جاری رہیں گی۔

صدر نے کہا کہ لاپتا عملے کے رکن کے حوالے سے صورتحال ابھی واضح نہیں اور اس بارے میں کسی حتمی ردعمل کا فیصلہ بعد میں کیا جائے گا۔

ایرانی میڈیا کے مطابق ایران نے تین امریکی لڑاکا طیارے تباہ کئے جبکہ ریسکیو کیلئے آنے والے ہیلی کاپٹروں کو بھی نشانہ بنایا گیا۔

پاسدارانِ انقلاب کے مطابق ایک جدید لڑاکا طیارہ وسطی ایران میں مار گرایا گیا جبکہ آبنائے ہرمز کے قریب ایک اور طیارہ تباہ ہوا، قیشم جزیرے کے قریب بھی امریکی جنگی جہاز کو نشانہ بنانے کا دعویٰ کیا گیا ہے۔

ایک غیر ملکی خبر رساں ادارے کے مطابق امریکی حکام نے بھی طیارہ گرنے کے واقعے کی تصدیق کی ہے، تاہم مزید تفصیلات سامنے نہیں آئیں۔