ٹرمپ نے آبنائے ہرمز کھلوانے کے لیے جاپان اور جنوبی کوریا سمیت اتحادی ممالک سے مدد طلب کر لی

واشنگٹن: امریکی صدر ڈونلڈ ٹرمپ نے آبنائے ہرمز میں بارودی سرنگیں بچھانے کے سابق بیان سے یوٹرن لیتے ہوئے چین، جاپان اور جنوبی کوریا سے تعاون کی اپیل کر دی۔

صدر ٹرمپ نے میڈیا سے گفتگو میں کہا کہ ایران پر اب تک 7 ہزار سے زائد اہداف کو نشانہ بنایا جا چکا ہے اور ان کارروائیوں نے ایران کی فوجی صلاحیت کو شدید نقصان پہنچایا ہے۔ انہوں نے کہا کہ امریکی فوج نے ایران کے تمام بارودی سرنگیں بچھانے والے جہاز تباہ کر دیے اور ایرانی بحریہ کی مائن بچھانے کی صلاحیت کو مکمل طور پر ختم کر دیا گیا ہے۔

امریکی صدر نے زور دیا کہ دیگر ممالک، خاص طور پر وہ جو آبنائے ہرمز سے تیل حاصل کرتے ہیں، اپنے بحری جہاز بھیج کر اس اہم آبی گزرگاہ میں جہاز رانی کے تحفظ میں کردار ادا کریں۔ انہوں نے کہا کہ امریکہ کا تیل یہاں سے نہیں آتا، مگر دیگر ممالک کے مفادات اس بندش سے متاثر ہو سکتے ہیں۔