حوثیوں پر حملے کی تیاری مکمل، ٹرمپ نے آخری مرحلے میں فیصلہ بدل دیا

امریکی صدر ڈونلڈ ٹرمپ نے یمن کے حوثی باغیوں کے خلاف ممکنہ بڑی فوجی کارروائی کو آخری مرحلے میں منسوخ کر دیا ہے، حالانکہ حملے کے لیے اہداف کا انتخاب مکمل تھا اور جنگی طیاروں کو مسلح کیا جا رہا تھا۔ امریکی حکام کے مطابق، حوثیوں کے بڑھتے ہوئے حملوں کے پیشِ نظر سعودی ولی عہد شہزادہ محمد بن سلمان نے جمعرات کے روز صدر ٹرمپ سے رابطہ کر کے تعاون کی اپیل کی تھی، جس کے بعد پینٹاگون کو کارروائی کی تیاریوں کا حکم دیا گیا تھا، تاہم صدر ٹرمپ نے اچانک فضائی حملوں کا یہ منصوبہ روک دیا۔

امریکی حکام کا کہنا ہے کہ امریکا پہلے ہی ایران کے ساتھ تنازع میں اپنے وسیع فوجی وسائل استعمال کر رہا ہے، جس کے باعث یمن میں نیا محاذ کھولنے سے امریکی افواج پر دباؤ میں اضافہ ہو سکتا تھا۔ اس کے علاوہ حوثیوں کی جانب سے عمان کی ثالثی میں طے پانے والے سابقہ سمجھوتے کے تحت امریکی بحری جہازوں کو نشانہ نہ بنانے کی یقین دہانی بھی اس فیصلے کی اہم وجہ بنی۔ فی الوقت امریکا نے آبنائے ہرمز اور باب المندب کی کشیدہ صورتاحال کے پیشِ نظر حوثیوں کے خلاف براہِ راست کارروائی سے گریز کرتے ہوئے سعودی عرب کے لیے صرف سفارتی و دفاعی حمایت جاری رکھنے کا فیصلہ کیا ہے۔