ٹرمپ نے گرین کارڈ لاٹری پروگرام معطل کر دیا

امریکی صدر ڈونلڈ ٹرمپ نے گرین کارڈ لاٹری پروگرام، جسے ڈائیورسٹی ویزا پروگرام کہا جاتا ہے، فوری طور پر معطل کرنے کا اعلان کر دیا ہے۔

امریکی محکمہ ہوم لینڈ سیکیورٹی کے مطابق یہ فیصلہ حالیہ فائرنگ کے واقعات کے بعد کیا گیا، جن میں ملوث مشتبہ شخص نے اسی ویزا پروگرام کے تحت امریکا میں داخلہ حاصل کیا تھا۔

ہوم لینڈ سیکیورٹی کی سیکریٹری کرسٹی نوئم نے کہا کہ صدر ٹرمپ کی ہدایت پر یو ایس سٹیزن شپ اینڈ امیگریشن سروسز کو ڈائیورسٹی ویزا پروگرام روکنے کی ہدایت جاری کر دی گئی ہے تاکہ عوام کے تحفظ کو یقینی بنایا جا سکے۔

ڈائیورسٹی ویزا پروگرام کے تحت ہر سال 55 ہزار تک افراد کو قرعہ اندازی کے ذریعے امریکا میں مستقل رہائش کے ویزے دیے جاتے ہیں، خاص طور پر ان ممالک کے شہریوں کو ترجیح دی جاتی ہے جہاں سے امریکا میں امیگریشن کی شرح کم ہو۔

تاہم ماہرین کا کہنا ہے کہ یہ پروگرام کانگریس کے تحت قائم کیا گیا تھا، اس لیے اس کی معطلی کے قانونی پہلوؤں پر سوالات اٹھائے جا رہے ہیں۔