امریکا ہی اب اصل اقوامِ متحدہ ہے، 11 مہینوں میں 8 جنگیں رکوا دیں: صدر ڈونلڈ ٹرمپ

امریکی صدر ڈونلڈ ٹرمپ نے کہا ہے کہ امریکا اب عملی طور پر اصل اقوامِ متحدہ کا کردار ادا کر رہا ہے اور اس نے صرف 11 مہینوں کے دوران دنیا بھر میں 8 جنگوں کے خاتمے میں اہم کردار ادا کیا ہے۔

صدر ٹرمپ نے تھائی لینڈ اور کمبوڈیا کے درمیان حالیہ جنگ بندی کا خیرمقدم کرتے ہوئے سوشل میڈیا پر جاری اپنے بیان میں کہا کہ انہیں خوشی ہے کہ دونوں ممالک کے درمیان لڑائی کا خاتمہ ہو گیا ہے اور امید ہے کہ معاہدے کے بعد تھائی لینڈ اور کمبوڈیا مستقبل میں امن کے ساتھ رہیں گے۔

ڈونلڈ ٹرمپ نے دونوں ممالک کی قیادت کو مبارکباد دیتے ہوئے کہا کہ رہنماؤں نے امن کے لیے بروقت اور منصفانہ فیصلہ کیا، جبکہ امریکا کو اس جنگ بندی میں کردار ادا کرنے پر فخر ہے۔

امریکی صدر کا کہنا تھا کہ امریکا نے صرف 11 مہینوں میں آٹھ مختلف جنگوں کو رکوانے میں مدد فراہم کی ہے اور یہی وجہ ہے کہ امریکا اب اصل اقوامِ متحدہ بن چکا ہے۔

انہوں نے عالمی تنازعات کے حل کے حوالے سے اقوامِ متحدہ کے کردار پر بھی سوال اٹھاتے ہوئے کہا کہ دنیا کے بڑے تنازعات کے حل میں کسی نے مؤثر مدد نہیں کی۔ صدر ٹرمپ کے مطابق روس اور یوکرین کی جنگ کے خاتمے میں بھی تاحال کوئی نمایاں پیش رفت نہیں ہو سکی، جبکہ اقوامِ متحدہ کو عالمی امن کے قیام کے لیے زیادہ فعال کردار ادا کرنا چاہیے۔