ٹرمپ نے سعودی عرب کو ایف 35 لڑاکا طیارے فروخت کرنے کا اعلان کر دیا

واشنگٹن: امریکی صدر ڈونلڈ ٹرمپ نے اعلان کیا ہے کہ سعودی عرب کو ایف 35 لڑاکا طیارے فروخت کیے جائیں گے۔ اوول آفس میں میڈیا سے گفتگو کرتے ہوئے صدر ٹرمپ نے کہا کہ سعودی ولی عہد محمد بن سلمان آج امریکا پہنچ رہے ہیں اور ہم سعودی عرب کو جدید لڑاکا طیارے فراہم کریں گے۔

غیر ملکی میڈیا کے مطابق سعودی عرب امریکا سے 48 ایف 35 طیارے خریدنے کا خواہاں ہے، جن کی مجموعی مالیت کئی ارب ڈالر ہے۔ سعودی ولی عہد وائٹ ہاؤس میں صدر ٹرمپ سے ملاقات کریں گے، جس کے لیے خصوصی انتظامات کیے گئے ہیں۔

ملاقات میں دفاع، مصنوعی ذہانت (AI) اور شہری نیو کلیئر پروگرام سمیت مختلف معاملات پر بات چیت ہوگی۔ سعودی عرب امریکا سے باقاعدہ سکیورٹی ضمانت کا خواہاں ہے، جبکہ امریکی صدر مئی میں سعودی عرب کے دورے کے دوران کیے گئے 600 ارب ڈالر کے سرمایہ کاری وعدوں کو عملی جامہ پہنانے کی کوشش کر رہے ہیں۔

صدر ٹرمپ نے اوول آفس میں ایران کی ایٹمی صلاحیت ختم ہونے کا بھی دعویٰ کیا اور کہا کہ جرائم کے بڑھتے ہوئے علاقوں میں فوج تعینات کی جائے گی۔ ساتھ ہی انہوں نے فیفا ورلڈ کپ کی سیکیورٹی کے لیے ٹاسک فورس کے قیام کا بھی اعلان کیا۔