واشنگٹن میں صدر ٹرمپ کی موجودگی میں عشائیے کے دوران فائرنگ، امریکی صدر محفوظ رہے

واشنگٹن میں امریکی صدر ڈونلڈ ٹرمپ کی موجودگی میں میڈیا نمائندوں کے اعزاز میں منعقدہ عشائیے کے دوران فائرنگ کا واقعہ پیش آیا، تاہم صدر ٹرمپ محفوظ رہے جبکہ حملہ آور کو گرفتار کرلیا گیا۔

امریکی ذرائع ابلاغ کے مطابق واقعہ شہر کے معروف ہوٹل میں منعقدہ تقریب کے دوران پیش آیا جہاں اچانک زور دار آواز سنائی دی جس کے بعد کچھ دیر کے لیے ہلچل مچ گئی۔

اطلاعات کے مطابق حفاظتی اہلکار فوری طور پر متحرک ہوئے اور صدر ٹرمپ کو تقریب سے محفوظ مقام پر منتقل کردیا گیا۔

عینی شاہدین کے مطابق تقریب میں موجود متعدد افراد خوف کے باعث میزوں کے نیچے چھپ گئے جبکہ سکیورٹی اہلکاروں نے فوری طور پر علاقے کو گھیرے میں لے لیا۔

ذرائع کا کہنا ہے کہ حملہ آور مرکزی داخلی راستے کی جانب بڑھا تھا جہاں اسے قابو کر لیا گیا۔ واقعے کے بعد حکام نے تحقیقات شروع کردی ہیں۔