ٹرمپ نے جنگ کے خاتمے کیلئے تہران کو سفید جھنڈا لہرانے کا مشورہ دے دیا

امریکی صدر ڈونلڈ ٹرمپ نے ایران پر سفارتی و فوجی دباؤ بڑھاتے ہوئے کہا ہے کہ جنگ ختم کرنے کے لیے تہران کو سفید جھنڈا لہرا کر ہتھیار ڈال دینے چاہئیں۔ امریکی خبر رساں ادارے ’فاکس نیوز‘ کو دیے گئے انٹرویو میں ٹرمپ نے واضح کیا کہ ان کی حکمتِ عملی کا کوئی مقررہ وقت نہیں ہے اور وہ اس تنازع کو جلدی میں ختم کرنا نہیں چاہتے، جبکہ امریکا کے وسط مدتی انتخابات بھی ان کے فیصلوں پر اثر انداز نہیں ہوں گے۔ انہوں نے دعویٰ کیا کہ دونوں ممالک کے درمیان براہِ راست پسِ پردہ رابطہ موجود ہے اور پاسدارانِ انقلاب سے وابستہ افراد اچھے پوکر کھلاڑی ہیں مگر وہ اب ختم ہو رہے ہیں۔ علاوہ ازیں اپنے سوشل میڈیا پلیٹ فارم ’ٹروتھ سوشل‘ پر جاری بیان میں امریکی صدر نے دہرایا کہ ایران کو کسی بھی صورت میں جوہری ہتھیار حاصل کرنے کی اجازت نہیں دی جائے گی اور اسے جوہری صلاحیت سے روکنا ان کی اولین ترجیح ہے۔