امریکی صدر ٹرمپ کا سعودی عرب، قطر اور یو اے ای کی درخواست پر ایران پر حملہ مؤخر کرنے کا اعلان

امریکی صدر ڈونلڈ ٹرمپ نے سعودی عرب، قطر اور متحدہ عرب امارات کی درخواست پر ایران پر  طے شدہ فوجی حملے کو مؤخر کرنے کا اعلان کر دیا ہے۔

صدر ٹرمپ نے اپنی سوشل میڈیا پلیٹ فارم پر جاری بیان میں کہا کہ انہیں قطر کے امیر شیخ تمیم بن حمد آل ثانی، سعودی عرب کے ولی عہد محمد بن سلمان اور متحدہ عرب امارات کے صدر محمد بن زاید آل نہیان کی جانب سے درخواست موصول ہوئی تھی کہ ایران پر مجوزہ فوجی کارروائی کو روکا جائے۔

ان کے مطابق اس وقت ایران کے ساتھ سنجیدہ مذاکرات جاری ہیں اور خلیجی رہنماؤں کی رائے ہے کہ ایک ایسا معاہدہ ممکن ہے جو نہ صرف امریکا بلکہ خطے اور عالمی سطح پر بھی قابلِ قبول ہوگا۔

ٹرمپ نے کہا کہ ممکنہ معاہدے کا بنیادی مقصد ایران کو کسی بھی قسم کے جوہری ہتھیار حاصل کرنے سے روکنا ہے۔

امریکی صدر نے مزید کہا کہ انہوں نے وزیر دفاع، چیئرمین جوائنٹ چیفس آف اسٹاف اور امریکی فوج کو ہدایت دی ہے کہ فی الحال حملہ مؤخر کیا جائے۔

تاہم انہوں نے واضح کیا کہ اگر مذاکرات ناکام ہوئے تو امریکا کسی بھی وقت ایران کے خلاف بڑے پیمانے پر کارروائی کے لیے مکمل طور پر تیار ہے۔