صدر ٹرمپ کی کریڈٹ کارڈ انٹرسٹ ایک سال کیلئے 10 فیصد تک محدود کرنے کی ہدایت

امریکی صدر ڈونلڈ ٹرمپ نے کریڈٹ کارڈ کمپنیوں سے کہا ہے کہ وہ عوام پر بوجھ کم کرنے کے لیے سود کی شرح ایک سال کے لیے 10 فیصد تک محدود کریں۔ ان کا کہنا ہے کہ 20 سے 30 فیصد تک سود لینا عام شہریوں کے ساتھ زیادتی ہے اور اب یہ سلسلہ مزید نہیں چلنے دیا جائے گا۔
صدر ٹرمپ نے کہا کہ یہ حد 20 جنوری 2026 سے نافذ ہونی چاہیے۔ ان کے مطابق یہ اقدام مہنگائی اور روزمرہ اخراجات سے پریشان امریکیوں کو ریلیف دینے کے لیے ہے۔
یہ اعلان ایسے وقت میں سامنے آیا ہے جب حکومت پہلے ہی کچھ بینکاری فیس کی حدیں ختم کر چکی ہے، جس پر اپوزیشن کی جانب سے تنقید بھی کی جا رہی ہے۔ ناقدین کا کہنا ہے کہ فیس پر پابندیاں ہٹانے کے بعد صرف سود کی حد مقرر کرنا کافی نہیں ہوگا۔
دوسری جانب ریپبلکن جماعت کے کئی رہنما مہنگائی کو عوام کا سب سے بڑا مسئلہ قرار دے رہے ہیں، خاص طور پر آنے والے وسط مدتی انتخابات کے تناظر میں۔
واضح رہے کہ اس سے قبل بھی امریکی کانگریس میں کریڈٹ کارڈ سود کو 10 فیصد تک محدود کرنے کی تجاویز پیش کی جا چکی ہیں۔ حامیوں کا کہنا ہے کہ گزشتہ چند برسوں میں سود کی شرح دوگنی ہو چکی ہے اور صرف ایک سال میں امریکی عوام نے اربوں ڈالر سود کی مد میں ادا کیے۔