ڈونلڈ ٹر مپ کا اٹلی میں تعینات امریکی فوجیوں کی ممکنہ منتقلی پر غور

امریکی صدر ڈونلڈ ٹرمپ نے اٹلی میں تعینات امریکی فوجیوں کی ممکنہ منتقلی پر غور کرنے کا عندیہ دیا ہے۔ عالمی میڈیا کی رپورٹ کے مطابق ڈونلڈ ٹرمپ نے دعویٰ کیا کہ جب ہمیں ضرورت تھی تو اٹلی ہمارے ساتھ نہیں تھا، تاہم انہوں نے ایران کی جانب سے امریکی امن تجویز پر متوقع ردعمل کے حوالے سے تبصرہ کرنے سے گریز کیا۔

دوسری جانب امریکی وزیر خارجہ مارکو روبیو نے روم کے دورے کے دوران کہا کہ ایران کی جانب سے واشنگٹن کی تجویز پر جواب متوقع ہے۔ ٹرمپ کے بیان پر ردعمل دیتے ہوئے اٹلی کے وزیر دفاع گائیڈو کروسیٹو نے کہا کہ وہ اس مؤقف کی منطق کو سمجھنے سے قاصر ہیں۔ انہوں نے واضح کیا کہ اٹلی اتحادی ممالک کے ساتھ آبنائے ہرمز میں بارودی سرنگوں کی صفائی اور بحری جہاز رانی کے تحفظ کے لیے ایک مشترکہ مشن کی تیاری میں مصروف ہے۔

امریکی محکمہ دفاع کے اعداد و شمار کے مطابق 2025ء کے اختتام تک تقریباً 12 ہزار 700 امریکی فوجی اٹلی میں مستقل طور پر تعینات تھے، جس کے باعث جرمنی کے بعد اٹلی یورپ میں امریکی فوج کی دوسری بڑی موجودگی رکھنے والا ملک ہے۔ ٹرمپ کے اس بیان کے بعد دونوں ممالک کے دفاعی تعلقات میں غیر یقینی کی صورتحال پیدا ہو گئی ہے۔