ٹرمپ نے امریکی اسلحے کے ذخائر میں کمی کی خبروں کو مسترد کر دیا

امریکی صدر ڈونلڈ ٹرمپ نے سوشل میڈیا پلیٹ فارم ‘ٹروتھ سوشل’ پر جاری ایک بیان میں کہا ہے کہ امریکا کے پاس بڑی مقدار میں جدید ترین اسلحہ موجود ہے اور ملکی سطح پر ہتھیاروں کی پیداوار بھی تیزی سے بڑھائی جا رہی ہے۔ انہوں نے بتایا کہ امریکی دفاعی کمپنیاں ملکی تاریخ میں سب سے بڑی تعداد میں اسلحہ فیکٹریاں قائم کر رہی ہیں۔ ہتھیاروں کے ذخائر میں کمی کے حوالے سے سامنے آنے والی رپورٹس کو رد کرتے ہوئے انہوں نے انکشاف کیا کہ ایسی معلومات افشا کرنے والے افراد ’غدار‘ ہیں، جن کی تلاش جاری ہے اور ان کے خلاف سخت قانونی کارروائی کرتے ہوئے طویل مدتی قید کی سزاؤں کا مطالبہ کیا جائے گا۔

لاس ویگاس، نیواڈا میں ایک تقریب سے خطاب کرتے ہوئے صدر ٹرمپ نے ایران کے حوالے سے بڑا دعویٰ کیا کہ امریکا دوسری جنگ عظیم کے بعد سب سے بڑی فوجی کارروائی کی تیاری کر رہا تھا، تاہم اسی اثنا میں ایرانی حکام نے ان سے رابطہ کر کے مذاکرات کی خواہش ظاہر کی۔ امریکی صدر کا کہنا تھا کہ وہ مزید فوجی کارروائی کے بجائے سفارتی حل کو ترجیح دیتے ہیں کیونکہ وہ انسانی جانوں کا ضیاع نہیں چاہتے، لیکن امریکا کا بنیادی مؤقف برقرار ہے کہ ایران کو کسی صورت جوہری ہتھیار حاصل نہیں کرنے دیے جائیں گے۔

یہ بیان ایسے وقت میں سامنے آیا ہے جب ٹرمپ انتظامیہ اور ایران کے درمیان آبنائے ہرمز کو بحری آمدورفت کے لیے مکمل طور پر کھولنے سے متعلق اہم مذاکرات جاری ہیں، جن میں ٹرمپ کے مطابق نمایاں پیشرفت ہوئی ہے۔ دوسری جانب، ایرانی وزارتِ خارجہ نے اعلان کیا ہے کہ ایران اور عمان نے آبنائے ہرمز سے گزرنے والے بحری جہازوں کے لیے ایک متفقہ راستے پر اتفاق کر لیا ہے اور اس اہم گزرگاہ کے مشترکہ انتظام کو حتمی شکل دی جا رہی ہے۔