ایران پر اقتصادی دباؤ جاری، سخت کارروائی بھی آپشن ہے، ٹرمپ

امریکی صدر ڈونلڈ ٹرمپ نے بیان دیا ہے کہ امریکا نے ایران کے خلاف تین واضح حکمت عملیاں اختیار کر رکھی ہیں، جن میں سخت معاشی دباؤ کے ساتھ ساتھ مذاکرات اور انتہائی سخت فوجی کارروائی بھی شامل ہے۔ امریکی صدر نے دعویٰ کیا کہ بی-2 (B-2) بمبار طیاروں کے ذریعے کارروائی کر کے انہوں نے ایران کو جوہری ہتھیار حاصل کرنے سے روک دیا ہے۔ ٹرمپ نے ایران کی معاشی صورتحال پر تبصرہ کرتے ہوئے کہا کہ شدید معاشی دباؤ کی وجہ سے ایران میں افراطِ زر (انفلیشن) 300 فیصد تک پہنچ چکا ہے، کرنسی بے قدر ہو چکی ہے اور ایرانی فوجیوں کو تنخواہوں کی ادائیگی میں مشکلات کا سامنا ہے۔ انہوں نے مزید کہا کہ سابق صدر باراک اوباما کا جوہری معاہدہ ایک تباہ کن اقدام تھا اور اگر وہ اسے ختم نہ کرتے تو ایران کافی عرصہ قبل جوہری صلاحیت حاصل کر چکا ہوتا۔