لبنان پر جارحیت، امریکی صدر ٹرمپ نے اسرائیلی وزیراعظم کو پاگل قرار دے دیا

امریکی صدر ڈونلڈ ٹرمپ نے لبنان میں اسرائیلی کارروائیوں پر شدید برہمی کا اظہار کرتے ہوئے اسرائیلی وزیراعظم بنیامین نیتن یاہو کو سخت تنقید کا نشانہ بنایا ہے۔

امریکی ذرائع کے مطابق دونوں رہنماؤں کے درمیان ہونے والی ٹیلیفونک گفتگو کے دوران صدر ٹرمپ نے لبنان میں اسرائیلی فوجی کارروائیوں اور بیروت کو نشانہ بنانے کی دھمکیوں پر سخت ناراضی کا اظہار کیا۔ ذرائع کا کہنا ہے کہ ٹرمپ نے نیتن یاہو کو مخاطب کرتے ہوئے انہیں “پاگل” قرار دیا اور خبردار کیا کہ لبنان میں مزید کشیدگی اسرائیل کو عالمی سطح پر تنہائی سے دوچار کر سکتی ہے۔

رپورٹ کے مطابق صدر ٹرمپ کا مؤقف تھا کہ اگرچہ اسرائیل کو اپنی سلامتی کے تحفظ کا حق حاصل ہے، تاہم حالیہ کارروائیاں ضرورت سے زیادہ اور غیر متناسب دکھائی دے رہی ہیں۔

امریکی حکام کے مطابق صدر ٹرمپ لبنان میں شہری ہلاکتوں پر بھی تشویش رکھتے ہیں اور انہوں نے اس بات پر اعتراض کیا کہ محدود اہداف کے حصول کے لیے بڑے پیمانے پر تباہی مچائی جا رہی ہے۔

ذرائع کا کہنا ہے کہ گفتگو کے دوران ٹرمپ نے بیروت پر ممکنہ حملے کے منصوبے کی مخالفت کی، جس کے بعد اسرائیل نے دارالحکومت میں مجوزہ کارروائی روک دی۔

امریکی حکام کے مطابق لبنان کی صورتحال پر ہونے والی یہ گفتگو حالیہ برسوں میں ٹرمپ اور نیتن یاہو کے درمیان ہونے والی سخت ترین بات چیت میں شمار کی جا رہی ہے۔