ٹرمپ نے بی بی سی کے خلاف ہتکِ عزت کا 5 ارب ڈالر کا مقدمہ دائر کر دیا

امریکی صدر ڈونلڈ ٹرمپ نے برطانوی نشریاتی ادارے بی بی سی کے خلاف ہتکِ عزت کا مقدمہ دائر کر دیا ہے۔ رپورٹس کے مطابق ٹرمپ نے فلوریڈا کی عدالت میں بی بی سی کے خلاف 5 ارب ڈالر ہرجانے کا دعویٰ دائر کیا ہے۔

امریکی صدر کا کہنا ہے کہ بی بی سی نے 6 جنوری کی ان کی تقریر کا ایڈٹ شدہ اور سیاق و سباق سے ہٹ کر کلپ نشر کیا، جس سے ان کی ساکھ کو شدید نقصان پہنچا۔ ٹرمپ کے مطابق ادارے نے ان کے بیانات کو اس انداز میں پیش کیا جس سے غلط تاثر پیدا ہوا۔

یاد رہے کہ بی بی سی نے ایک ڈاکیومنٹری میں ٹرمپ کی تقریر کے مختلف حصوں کو جوڑ کر یہ تاثر دیا تھا کہ انہوں نے اپنے حامیوں کو کیپیٹل کی جانب مارچ اور تشدد پر اکسانے کی ہدایت دی۔

تاہم بعد ازاں یہ واضح ہوا کہ مذکورہ جملے تقریر کے مختلف حصوں سے لیے گئے تھے، جو تقریباً ایک گھنٹے کے وقفے سے ادا کیے گئے تھے، لیکن انہیں یکجا کر کے نشر کیا گیا۔

بی بی سی نے بعد میں اپنے عمل کو غلط قرار دیتے ہوئے ڈونلڈ ٹرمپ سے معذرت بھی کر لی۔ ادارے نے تسلیم کیا کہ 6 جنوری 2021 کی تقریر کے مختلف حصوں کو اس انداز میں جوڑا گیا جس سے یہ غلط تاثر پیدا ہوا کہ ٹرمپ نے براہِ راست تشدد پر اکسانے کی اپیل کی تھی۔

اس معاملے پر بی بی سی کے ڈائریکٹر جنرل ٹم ڈیوی اور بی بی سی نیوز کی سربراہ ڈیبورا ٹرنس مستعفی بھی ہو چکی ہیں۔