امریکی صدر ٹرمپ نے اسرائیلی صدر کو کمزور اور نیتن یاہو کو اسرائیل کی بقا کا ضامن قرار دیا

امریکی صدر ڈونلڈ ٹرمپ نے اسرائیلی صدر آئزک ہرزوگ کو کمزور اور غیر مؤثر شخصیت قرار دیتے ہوئے کہا ہے کہ اگر نیتن یاہو وزیر اعظم نہ ہوتے تو شاید آج اسرائیل کا وجود بھی نہ ہوتا۔
اسرائیلی ٹی وی چینل کو دیے گئے انٹرویو میں ڈونلڈ ٹرمپ نے کہا کہ اسرائیلی صدر آئزک ہرزوگ معافی کے اختیار کو استعمال کرتے ہوئے اسے نیتن یاہو کے سر پر لٹکائے ہوئے ہیں، تاہم انہوں نے اب تک نیتن یاہو کو معافی دینے سے انکار کیا ہے۔
ٹرمپ نے نیتن یاہو کی تعریف کرتے ہوئے کہا کہ وہ مکمل طور پر ان کے ساتھ کھڑے ہیں اور ان کے خیال میں نیتن یاہو کی قیادت نے اسرائیل کو مضبوط بنایا ہے۔
ایک سوال کے جواب میں ٹرمپ نے کہا کہ انہیں نہیں لگتا کہ کوئی اور رہنما وہ کامیابیاں حاصل کرسکتا تھا جو انہوں نے اور نیتن یاہو نے مل کر حاصل کیں۔
ایران کے ساتھ جاری کشیدگی کے حوالے سے گفتگو کرتے ہوئے ڈونلڈ ٹرمپ نے کہا کہ ممکن ہے دیگر ممالک بھی اس تنازع میں شامل ہوں، کم از کم آبنائے ہرمز کو کھلا رکھنے کے معاملے میں ایسا ہوسکتا ہے۔
انہوں نے کہا کہ کئی ممالک اپنا تیل اسی آبنائے سے حاصل کرتے ہیں جبکہ امریکا کو اس راستے سے براہ راست فائدہ نہیں ہوتا، اس لیے ان ممالک کو اس معاملے میں کردار ادا کرنا چاہیے۔