ٹرمپ کا کینیڈین گاڑیوں، آٹو پارٹس اور سٹیل پر 50 فیصد ٹیرف کا اعلان

امریکی صدر ڈونلڈ ٹرمپ نے کینیڈا کے ساتھ تجارتی کشیدگی کو بڑھاتے ہوئے یکم جنوری 2027 سے کینیڈین گاڑیوں، ٹرکوں، آٹو پارٹس اور اسٹیل پر 50 فیصد درآمدی ٹیرف عائد کرنے کا اعلان کیا ہے۔ سوشل میڈیا پلیٹ فارم ‘ٹروتھ سوشل’ پر جاری ایک بیان میں انہوں نے کینیڈین حکومت کو تنقید کا نشانہ بناتے ہوئے الزام عائد کیا کہ کینیڈا کے تجارتی اقدامات کے باعث امریکا کو سالانہ 60 ارب ڈالر کا خسارہ ہو رہا ہے اور امریکی کسان مشکلات کا شکار ہیں۔ ڈونلڈ ٹرمپ نے واضح کیا کہ امریکا اب کینیڈا کو مزید رعایتیں دینے کے لیے تیار نہیں کیونکہ کینیڈا کو امریکا کی ضرورت ہے، امریکا کو کینیڈا کی نہیں۔ یاد رہے کہ تجارتی مذاکرات کی ناکامی کے بعد دونوں ممالک کے درمیان کشیدگی شدت اختیار کر چکی ہے۔