ٹرمپ نے اپنی اور کابینہ ممبران کی نیم برہنہ تصویر پوسٹ کردی

صدر ڈونلڈ ٹرمپ نے اپنے سوشل میڈیا پلیٹ فارم ‘ٹروتھ سوشل’ پر مصنوعی ذہانت سے تیار کردہ 11 تصاویر شیئر کیں، جن میں سے ایک تصویر نے انٹرنیٹ پر ہنگامہ برپا کر دیا ہے۔ اس تصویر میں 79 سالہ صدر ٹرمپ کو وزیر خارجہ مارکو روبیو، نائب صدر جے ڈی وینس اور وزیر داخلہ ڈوگ برگم کے ہمراہ واشنگٹن ڈی سی کے “لنکن میموریل ریفلیکٹنگ پول” میں بغیر شرٹ کے آرام کرتے دکھایا گیا ہے۔ یہ تصاویر ایک ایسے وقت میں سامنے آئی ہیں جب صدر ٹرمپ کے حکم پر اس تاریخی تالاب کی 1.5 ملین ڈالر کی لاگت سے تزئین و آرائش کی جا رہی ہے۔ صدر نے پچھلی انتظامیہ کو تالاب کی خراب حالت کا ذمہ دار ٹھہراتے ہوئے کہا کہ اسے امریکہ کی 250 ویں سالگرہ سے قبل جدید اور خوبصورت بنایا جائے گا۔