جعلی اندراج کا الزام: ٹرمپ انتظامیہ کا افورڈیبل کیئر ایکٹ (اوباما کیئر) کے 7 لاکھ 60 ہزار صارفین کو نکالنے کا اعلان

امریکی نائب صدر جے ڈی وینس اور ٹرمپ انتظامیہ کے اعلیٰ حکام نے افورڈیبل کیئر ایکٹ (ACA / اوباما کیئر) کے تحت سرکار سے معاونت حاصل کرنے والے 7 لاکھ 60 ہزار افراد کو پبلک ہیلتھ کیئر ایکسچینج سے نکالنے کے منصوبے کا باضابطہ اعلان کیا ہے۔ وینس اور ہیلتھ حکام کا الزام ہے کہ یہ افراد یا تو جعلی دستاویزات کے ذریعے پروگرام میں شامل ہوئے تھے یا پھر ان کا سرے سے کوئی وجود ہی نہیں ہے۔ حکومتی اینٹی فراڈ ٹاسک فورس کے سربراہ اور نائب صدر وینس نے پریس کانفرنس میں بتایا کہ تقریباً 3 لاکھ 15 ہزار غیر مجاز اندراجات کی منسوخی سے مجموعی طور پر 7 لاکھ 60 ہزار افراد کی انشورنس ختم کی جائے گی، جس سے امریکی قومی خزانے کو 2.2 ارب ڈالر کی بچت ہوگی۔ اس کے علاوہ مزید 4 لاکھ 19 ہزار افراد کے کوائف اور اہلیت کی دوبارہ جانچ پڑتال کی جائے گی۔ ٹرمپ انتظامیہ نے ہیلتھ کیئر انشورنس کے نئے ایجنٹوں اور بروکادز کی رجسٹریشن پر چھ ماہ کی پابندی بھی عائد کر دی ہے، جن کے بارے میں حکام کا دعویٰ ہے کہ وہ جعلی اندراجات میں مرکزی کردار ادا کر رہے ہیں۔ ٹرمپ انتظامیہ کا کہنا ہے کہ یہ قدم سرکاری اخراجات میں بے جا اضافے کو روکنے اور ٹیکس دہندگان کے پیسوں کی حفاظت کے لیے اٹھایا گیا ہے۔ تاہم، ہیلتھ کیئر پالیسی کے ماہرین اور اپوزیشن ڈیموکریٹک رہنماؤں نے اس اقدام پر شدید تنقید کی ہے۔ ڈیموکریٹک ارکانِ کانگریس کے مطابق، ٹرمپ کی دوسری مدتِ صدارت کے دوران سبسڈیز کے خاتمے سے پہلے ہی ہیلتھ انشورنس کے پریمیم دو سے تین گنا بڑھ چکے ہیں، اور اب دھوکہ دہی کے نام پر لاکھوں مستحق شہریوں کو طبی سہولیات سے محروم کیا جا رہا ہے۔ ماہرین نے شفافیت کا مطالبہ کرتے ہوئے خدشہ ظاہر کیا ہے کہ بغیر درست طریقہ کار کے حقیقی اور مستحق صارفین کو بھی فہرست سے باہر نکال دیا گیا ہے۔