مانچسٹر میں ٹریفک حادثہ، 3 پاکستانی نوجوان جاں بحق

برطانیہ کے شہر مانچسٹر میں ٹیکسی اور کار کے درمیان ہونے والے شدید ٹریفک حادثے کے نتیجے میں تین پاکستانی نوجوانوں سمیت چار افراد جان کی بازی ہار گئے، جبکہ پانچ افراد زخمی ہو گئے۔

برطانوی اخبار دی سن کے مطابق حادثے میں جاں بحق ہونے والے پاکستانی نوجوانوں کی شناخت دانیال علی، محمد مختار اور فرحان پٹیل کے نام سے ہوئی ہے، جبکہ ٹیکسی ڈرائیور 50 سالہ مسروب علی بھی حادثے میں جانبر نہ ہو سکے۔

واقعے کے فوراً بعد ریسکیو اور ایمبولینس ٹیمیں موقع پر پہنچ گئیں اور زخمیوں کو قریبی ہسپتال منتقل کیا گیا، جہاں انہیں طبی امداد فراہم کی جا رہی ہے۔

پولیس حکام کا کہنا ہے کہ حادثے کی وجوہات جاننے کے لیے تحقیقات جاری ہیں، تاہم تاحال یہ واضح نہیں ہو سکا کہ حادثہ تیز رفتاری، لاپرواہی یا کسی اور وجہ سے پیش آیا۔