رواں سال کا پہلا مکمل چاند گرہن آج ہوگا، پاکستان سمیت مختلف ملکوں میں دیکھا جاسکے گا

رواں سال کا پہلا مکمل چاند گرہن آج ہوگا جسے پاکستان سمیت دنیا کے مختلف خطوں میں دیکھا جا سکے گا۔ ماہرین فلکیات کے مطابق اس دوران چاند سرخی مائل رنگ اختیار کر لے گا جس سے آسمان پر دلکش منظر دکھائی دے گا۔

محکمہ موسمیات کے مطابق پاکستان میں چاند گرہن کا آغاز دن ایک بجکر چوالیس منٹ پر ہوگا جبکہ دوپہر دو بجکر پچاس منٹ پر چاند کو باقاعدہ گرہن لگنا شروع ہوگا۔

شام چار بجکر پانچ منٹ پر مکمل چاند گرہن کا آغاز ہوگا اور چار بجکر چونتیس منٹ پر یہ اپنے عروج پر پہنچ جائے گا۔

محکمہ موسمیات کے مطابق شام پانچ بجکر تین منٹ پر مکمل گرہن ختم ہونا شروع ہوگا، جبکہ جزوی گرہن کا اختتام شام چھ بجکر سترہ منٹ پر ہوگا۔ رات سات بجکر تیئیس منٹ پر چاند گرہن مکمل طور پر ختم ہو جائے گا۔

ماہرین فلکیات کا کہنا ہے کہ پاکستان کے مختلف شہروں میں چاند طلوع ہونے کے وقت گرہن جزوی طور پر دکھائی دے گا، جس سے شہریوں کو ایک منفرد فلکیاتی منظر دیکھنے کا موقع ملے گا۔

چاند گرہن ایشیا، آسٹریلیا، شمالی و جنوبی امریکا اور دیگر کئی علاقوں میں بھی دیکھا جا سکے گا۔