پاک افغان کشیدگی: طورخم بارڈر پر نقل و حرکت معطل، افغان پناہ گزینوں کی واپسی کا عمل رک گیا

پاکستان اور افغانستان کے درمیان بڑھتی ہوئی سرحدی کشیدگی کے باعث ضلع خیبر میں طورخم سرحدی گزرگاہ کو ہر قسم کی نقل و حرکت کے لیے بند کر دیا گیا ہے۔ ضلعی انتظامیہ کے مطابق سکیورٹی حالات کے پیشِ نظر افغان پناہ گزینوں کی رضاکارانہ وطن واپسی کا عمل عارضی طور پر معطل رہے گا۔ ذرائع کا کہنا ہے کہ گزشتہ رات افغان فورسز کی جانب سے فائرنگ کے بعد پیدا ہونے والی صورتحال کے باعث ٹرمینل پر کھڑی پناہ گزینوں کی درجنوں گاڑیوں کو حفاظتی اقدام کے طور پر لنڈی کوتل منتقل کر دیا گیا ہے تاکہ کسی بھی ممکنہ جانی یا مالی نقصان سے بچا جا سکے۔