اسپائیڈر مین کا پاکستانی مداحوں کیلئے خصوصی پیغام جاری

ہالی ووڈ کی بلاک بسٹر فلم سیریز ’اسپائیڈر مین‘ کے مداحوں کے لیے خوش آئند خبر سامنے آئی ہے۔ سیریز کے نئے سیکوئل ’اسپائیڈر مین: برینڈ نیو ڈے‘ (Spider-Man: Brand New Day) کی عالمی ریلیز سے قبل فلم کے مرکزی اداکار ٹام ہالینڈ اور ہالی ووڈ اسٹار جون برنتھل نے پاکستانی مداحوں کے لیے ایک خصوصی اور محبت بھرا ویڈیو پیغام جاری کیا ہے۔

سوشل میڈیا پر شیئر کیے گئے اس پیغام میں ٹام ہالینڈ نے پاکستانی شائقین کا شکریہ ادا کرتے ہوئے کہا کہ “ہیلو پاکستان! اسپائیڈرمین سیریز کو دیکھنے اور اتنے سالوں سے مسلسل اتنی محبت دینے کے لئے آپ سب کا بہت شکریہ۔” ان کا مزید کہنا تھا کہ پاکستانی مداحوں کی اسی والہانہ سپورٹ کی وجہ سے سیریز کی گزشتہ فلم ’اسپائیڈر مین: نو وے ہوم‘ نے باکس آفس پر کامیابی کے تمام پچھلے ریکارڈ پاش پاش کیے۔  پیغام میں ٹام ہالینڈ کے ہمراہ موجود معروف اداکار جون برنتھل نے بات کو آگے بڑھاتے ہوئے پاکستانی شائقین سے اپیل کی کہ وہ جس طرح ماضی میں اس فرینچائز کو سپورٹ کرتے آئے ہیں، بالکل اسی طرح اب آنے والے نئے سیکوئل ’اسپائیڈر مین: برینڈ نیو ڈے‘ کو بھی دیکھ کر سینما گھروں میں کامیاب بنائیں۔

واضح رہے کہ ہالی ووڈ کی یہ سنسنی خیز اور سال کی سب سے بڑی فلموں میں سے ایک ’اسپائیڈر مین: برینڈ نیو ڈے‘ رواں ماہ کی آخری تاریخ یعنی 31 جولائی کو پاکستان بھر کے سینما گھروں کی زینت بنے گی، جس کا شائقینِ فلم کو بے صبری سے انتظار ہے۔