ٹک ٹاکر شمسو قتل کیس کا ڈراپ سین، والد، بھائی سمیت 5 ملزمان گرفتار

راولپنڈی کے علاقے ٹیکسلا میں سوشل میڈیا پر معروف ٹک ٹاکر شمسو بی بی (عائشہ گلامنہ) کے قتل کا ڈراپ سین ہو گیا ہے۔ راولپنڈی پولیس نے کارروائی کرتے ہوئے مقتولہ کے والد، حقیقی بھائی اور چچا زاد بھائیوں سمیت 5 ملزمان کو گرفتار کر لیا ہے۔ ایس ایس پی آپریشنز طارق محبوب نے پریس کانفرنس کرتے ہوئے بتایا کہ ابتدائی تحقیقات کے مطابق قتل غیرت کے نام پر کروایا گیا، جبکہ ملزمان نے گرفتاری سے بچنے کے لیے ڈھونگ بھی رچایا۔

ایس ایس پی آپریشنز کے مطابق سی پی او حسن مشتاق سکھیرا کی ہدایت پر بننے والی ٹیموں نے 100 سے زائد سی سی ٹی وی کیمروں کی فٹیج اور ہیومن انٹیلی جنس کی مدد سے تفتیش کی، جس دوران مقتولہ کے والد فضل اور بھائی بشیر نے دیگر ساتھیوں کی مدد سے قتل کی منصوبہ بندی اور عملدرآمد کا اعتراف کر لیا۔ پولیس حکام کا کہنا ہے کہ تمام گرفتار ملزمان کے خلاف ٹھوس اور سائنسی شواہد کے ساتھ عدالت میں چالان پیش کر کے انہیں قرار واقعی سزا دلوائی جائے گی۔