پاکستان میں ٹک ٹاک تفریح نہیں، معلومات اور تلاش کا اہم پلیٹ فارم بن گیا

پاکستان میں مختصر ویڈیو شیئرنگ پلیٹ فارم ٹک ٹاک تیزی سے محض تفریحی ایپ سے آگے بڑھ کر معلومات، سیکھنے اور دریافت کا ترجیحی ذریعہ بنتا جا رہا ہے، جہاں صارفین اب مستند اور فوری معلومات کے لیے سرچ فیچر کو مؤثر طور پر استعمال کر رہے ہیں۔

کمپنی کے مطابق صارفین ٹک ٹاک کو ایک ’ویڈیو فرسٹ‘ سرچ انجن کے طور پر اپناتے جا رہے ہیں، جہاں مختصر ویڈیوز کے ذریعے امتحان کی تیاری، سفر کی منصوبہ بندی، تازہ خبریں، کھانوں، فٹنس اور نئی مہارتیں سیکھی جا رہی ہیں۔ اس رجحان سے ظاہر ہوتا ہے کہ صارفین تحریری مواد کے بجائے کری ایٹرز کی جانب سے پیش کردہ بصری اور سیاق و سباق سے بھرپور معلومات کو ترجیح دے رہے ہیں۔

اعداد و شمار کے مطابق گزشتہ ایک برس کے دوران پاکستان میں تعلیمی، ثقافتی، سفری، طرزِ زندگی اور ”ہاؤ ٹو“ مواد سے متعلق تلاش میں نمایاں اضافہ ہوا۔ #TravelTok کی تلاش میں 53 فیصد، #FoodTok میں 52 فیصد، #StudyTok میں 60 فیصد جبکہ #FitnessTok میں سب سے زیادہ 66 فیصد سالانہ اضافہ ریکارڈ کیا گیا۔

تجزیوں کے مطابق ٹک ٹاک کا سرچ فیچر پاکستانی صارفین کے لیے حقیقی زندگی سے جڑے سوالات کے فوری اور مستند جوابات حاصل کرنے کا ایک طاقتور ذریعہ بن چکا ہے، جو پلیٹ فارم کو تفریح سے بڑھ کر ایک معلوماتی تجربے میں تبدیل کر رہا ہے۔