خود سیاست میں آتے ہو اور پھر ہم سے کہتے ہو کہ سیاست میں کیوں گھسٹتے ہو۔مولانا فضل الرحمن

کراچی کے علاقے لیاری میں منعقدہ تحفظِ مدارسِ دینیہ کانفرنس سے خطاب کرتے ہوئے جمعیت علمائے اسلام کے سربراہ مولانا فضل الرحمن نے کہا کہ دینی مدارس کے خلاف منظم سازش کے تحت نوجوانوں کے دل و دماغ میں شکوک پیدا کیے جا رہے ہیں اور یہ تاثر دیا جا رہا ہے کہ مدارس نوجوانوں کی صلاحیتیں محدود کرتے ہیں، حالانکہ مدارس کے قیام کی اصل وجوہات کو جان بوجھ کر نظر انداز کیا جاتا ہے۔

مولانا فضل الرحمن نے کہا کہ پاکستان، بھارت اور بنگلہ دیش میں مدارس کا قیام اس وقت عمل میں آیا جب معاشرے میں دین سے دوری بڑھ رہی تھی۔ انہوں نے الزام عائد کیا کہ نوجوانوں کو دین سے دور کرنے کی سازش ہو رہی ہے اور آج انہیں بیرونی طاقتوں سے نہیں بلکہ اپنے ہی مسلمان بھائیوں، حکمرانوں، بیوروکریسی اور اسٹیبلشمنٹ سے خطرہ محسوس ہو رہا ہے۔

انہوں نے کہا کہ ملک کا مجموعی نظام زوال کا شکار ہے اور دینی مدارس ہی ہیں جنہوں نے نظریاتی بنیادوں کو کسی حد تک سنبھال رکھا ہے۔ مولانا فضل الرحمن نے یاد دلایا کہ 2004 اور 2010 میں مدارس سے متعلق معاہدے کیے گئے مگر ان پر عملدرآمد نہیں ہوا۔ انہوں نے واضح کیا کہ دینی مدارس کے خلاف کوئی سازش کامیاب نہیں ہونے دی جائے گی اور مدارس کے تشخص اور آزادی کا ہر صورت دفاع کیا جائے گا۔