اقلیتوں کے حقوق پر کوئی سمجھوتہ نہیں ہوگا: وزیراعلیٰ پنجاب مریم نواز

وزیراعلیٰ پنجاب مریم نواز شریف نے لاہور میں کرسمس کی تقریب سے خطاب کرتے ہوئے کہا کہ صوبے میں اقلیتوں کے حقوق کی مکمل حفاظت کی جائے گی۔ انہوں نے کہا کہ اگر کسی بھی اقلیتی رکن کے ساتھ زیادتی ہوئی تو وہ اس کے خلاف سیسہ پلائی دیوار کی طرح کھڑی ہوں گی۔

وزیراعلیٰ نے کہا کہ صوبے میں اقلیتوں کے لیے قبرستانوں اور دیگر سہولیات کے مسائل فوری حل کیے جائیں گے اور اقلیتی رہنما رمیش سنگھ اروڑا کو بجٹ کی تفصیلات فراہم کرنے کی ہدایت دی گئی۔ انہوں نے واضح کیا کہ پنجاب میں سب شہری، چاہے مسلمان، سکھ، ہندو یا مسیحی ہوں، برابر کے حقوق رکھتے ہیں۔

مریم نواز نے ستھرا پنجاب کے ورکرز کی جانب سے چرچز کی صفائی کی تعریف کی اور کہا کہ صوبے کی تمام عبادت گاہوں کو صاف اور محفوظ بنایا جا رہا ہے۔ انہوں نے بتایا کہ حکومت اقلیتوں کے لیے فنڈز بڑھا رہی ہے اور مینارٹی کارڈ کی رقم 75 ہزار سے بڑھا کر ایک لاکھ روپے کی جائے گی تاکہ فلاح و بہبود میں اضافہ ہو۔

انہوں نے کہا کہ پنجاب کو دنیا کے سامنے مثال بنانا ہے اور صوبے کے تمام شہری سیسہ پلائی دیوار کی طرح متحد اور محفوظ ہیں۔