طارق رحمان بنگلادیش نیشنلسٹ پارٹی کے چیئرمین مقرر

بنگلادیش نیشنلسٹ پارٹی (بی این پی) کی قائمہ کمیٹی نے جمعہ کی شب طارق رحمان کو پارٹی کا چیئرمین مقرر کرنے کی منظوری دے دی۔ یہ فیصلہ پارٹی کے گلشن دفتر میں منعقدہ اجلاس میں کیا گیا۔

خیال رہے کہ سابق وزیراعظم خالدہ ضیاء کے بیٹے طارق رحمان 17 سالہ جلاوطنی کے بعد گزشتہ ماہ لندن سے وطن واپس آئے تھے۔ ان کی واپسی کے صرف پانچ دن بعد، 30 دسمبر کو سابق وزیرِ اعظم اور بی این پی کے بانی ضیاءالرحمان کی اہلیہ خالدہ ضیا طویل علالت کے بعد انتقال کر گئیں۔ ان کی وفات کے ساتھ ہی بی این پی کی پہلی قیادت کی آخری زندہ کڑی بھی ٹوٹ گئی۔

اب طارق رحمان محض خالدہ ضیا کے جانشین نہیں رہے، بلکہ 12 فروری کو متوقع انتخابات کی طرف بڑھتی ہوئی بی این پی کے بلاشرکت غیرے قائد بھی بن چکے ہیں۔