خیبر پختونخوا میں امن و امان کی صورتِ حال پر پی ٹی آئی جواب دہ ہے: طارق فضل چودھری

وفاقی وزیر پارلیمانی امور ڈاکٹر طارق فضل چوہدری نے کہا ہے کہ خیبر پختونخوا میں امن و امان کی بگڑتی صورتِ حال پر 13 سال سے اقتدار میں موجود پاکستان تحریک انصاف (پی ٹی آئی) کو جواب دینا ہوگا۔ سماجی رابطے کی ویب سائٹ ایکس (X) پر جاری اپنے بیان میں وفاقی وزیر نے واضح کیا کہ وفاقی حکومت کی اولین ترجیح عوام کا تحفظ اور صوبے میں امن کا قیام ہے۔ انہوں نے مولانا فضل الرحمٰن کی جانب سے خیبر پختونخوا میں ایمرجنسی کے امکان کو معدنی وسائل پر قبضے سے جوڑنے کو افسوسناک قرار دیتے ہوئے کہا کہ دہشت گردی جیسے سنگین قومی مسئلے کو سیاسی الزام تراشی کی نذر نہیں کرنا چاہیے۔ طارق فضل چوہدری کا مزید کہنا تھا کہ افواجِ پاکستان امن کے لیے جانوں کے نذرانے پیش کر رہی ہیں، لہٰذا تمام سیاسی قوتوں کو متحد ہو کر دہشت گردی کے خاتمے کے لیے قومی حکمتِ عملی کا ساتھ دینا چاہیے۔