خیبرپختونخوا میں دہشتگردی کے خاتمے تک رہیں گے، کوئی سیاسی ایجنڈا نہیں: طلال چوہدری

وزیرِ مملکت برائے داخلہ طلال چوہدری نے واضح کیا ہے کہ خیبر پختونخوا میں آئینی آپشن یعنی ایمرجنسی کا نفاذ کسی سیاسی مقصد کے لیے نہیں بلکہ صوبائی حکومت کی جانب سے دہشت گردی کے خلاف عدمِ تعاون پر مجبورا ًکیا گیا۔ انہوں نے اعادہ کیا کہ وفاقی حکومت کا کوئی سیاسی ایجنڈا نہیں ہے اور سیکیورٹی فورسز دہشت گردی کے مکمل خاتمے تک وہاں موجود رہیں گی۔

میڈیا نمائندوں سے گفتگو کرتے ہوئے طلال چوہدری نے کہا کہ ملک میں بلاامتیاز دہشت گردی کا خاتمہ ناگزیر ہو چکا ہے، کیونکہ امن و امان کے بغیر نہ تو کاروبار چل سکتا ہے اور نہ ہی ملک آگے بڑھ سکتا ہے۔ انہوں نے بتایا کہ گزشتہ ڈھائی سالوں میں وفاقی حکومت نے ہر ممکن طریقہ آزمایا اور خیبر پختونخوا کے وزرائے اعلیٰ نے جو مانگا وہ فراہم کیا گیا۔ تاہم جب صوبائی سطح پر دہشت گردوں کو کھلم کھلا دہشت گرد کہنے اور ان کے خلاف سخت کارروائی سے گریز کیا گیا، تو وفاق کے پاس آئینی آپشن کے سوا کوئی راستہ نہیں بچا تھا۔

وزیرِ مملکت نے مزید انکشاف کیا کہ وزیراعظم کی ہدایت پر پی ٹی آئی کے ساتھ مذاکرات میں ان کے تمام سیاسی مطالبات تسلیم کیے جا رہے تھے اور ‘میثاقِ جمہوریت ٹو’ (Charter of Democracy 2) کا آغاز ہونے جا رہا تھا، مگر اپوزیشن کی جانب سے عدم دلچسپی قومی مفاد پر اتفاق نہ ہونے کی ایک اور سیاسی ناکامی ہے۔ طلال چوہدری نے واضح کیا کہ خیبر پختونخوا میں یہ اقدام نہ پشتونوں کے خلاف ہے اور نہ ہی صوبے کے عوام کے؛ صرف مقدمات میں نامزد و مطلوب افراد کو گرفتار کیا جائے گا اور امن و امان کی بحالی کے ساتھ ہی آئینی اختیارات منتقل کر دیے جائیں گے۔